الجمعة، 4 ديسمبر 2015

أفكار مشاريع منزلية للمغتربات


افكار مشاريع منزلية للمغتربات ... 

اولا ازيكم يا مغتربات في كل مكان وخصوصا اخواتي مغتربات السعودية 

انا فكرت في الموضوع ده علشان اي واحدة عندها فكرة لمشروع يتعمل من البيت ويكون سهل واي واحدة فينا تقدر تعمله تكتبه على طول 

واهو نقدر نشغل نفسنا في الغربة بدل الفراغ اللي هيقتلنا ده وكمان نساعد اجوازنا عالاقل نوفر طلباتنا ويبقى قعدتنا هنا بفايدة 

فياريت اللي عندها فكرة مشروع او تكون عملت مشروع ونجح معاها تكتبه ولو حتى فشل تكتب برده ايه تجربتها ونستفيد كلنا 

وانا اول واحدة هبدأ بشوية افكار انا منفذتش منها اي حاجه لكن باذن الله هنفذ بعد الولادة .......

1. مشروع اكل بيتي مصري :

بجد يا جماعة المشروع ده حلو اوي ومطلوب اوي انا واحدة من الناس بدور على اي واحدة تكون بتعمل اكل بيتي مصري
لاني حامل ومش بقدر اعمل اكل في المدينة ومش لاقية حد خالص واكيد في زيي كتير ومش المصريين المغتربات بس لا والسعوديين كمان
لو سوقت لنفسها كويس هيجيلها ناس كتير باذن الله وخصوصا لو كانت واحدة بتعرف تعمل اكلات كتير ومتميزة في اكلها ونضافتها واسعارها 
تكون حنينة طبعا لاننا مغتربات وبيهمنا التكاليف اكيد .

2. مشروع كوافيرة منزلية :

المشروع ده باه اللي هاييل فعلا لو في واحدة بتعرف كويس في شغل الكوافير ولو حتى حاجه بسيطة وش وحواجب وتشقير وشمع وسيشوار 
وتتعلم الباقي من هنا في دورات تعليم ميكب وتسريحات شعر جناااااااااااااااااان واللي هتعمل المشروع ده هيبقى في بيتها 
يعني الستات هي اللي تروح لها مش هي اللي تروح لاي حد ودي الفكرة في كل المشاريع انها تكون من منزلها ( وده طبعا اكثر امانا ) 
انتوا عارفين هنا المشاغل في السعودية غالية جداااااااااا يعني اقل حاجه علشان تروح واحدة تعمل وشها ب 30 ريال وده طبعا مكلف اوي 
احنا في مصر كنا بنعمل وش وحواجب ونطلع بنلمع ومبندفعش اكتر من 10 جنيه لو واحدة عملت المشروع ده من بيتها ورخصت طبعا في الاسعار 
هيبقى مشروع هايل بجد.

3. مشروع حضانة منزلية :

برده مشروع حلو اوي بس محتاج واحدة يكون عندها صبر وخبرة للتعامل مع الاطفال وكمان محتاج مكان 
ولو اتوفرت الشروط دي هيبقى مشروع حلو اوي .

4. مشروع كتابة رسائل علمية او كتب مدرسية او اي اوراق محتاجة كتابة عالكمبيوتر :

طبعا كلنا عندنا كمبيوتر وبنقضي عليه اغلب الوقت فالاحسن اننا نقضيه في حاجه مفيدة وكمان كلنا بنعرف نكتب تقريبا واحنا مغمضين 
فهتبقى حاجه هايلة لو واحدة تعمل لنفسها دعاية في المكان اللي هي فيه انها تقدر تكتب اي حاجه وباسعار اقل من بره طبعا علشان تبقى متميزة 
وكمان الاحلى لو جابت برينتر وطبعت من البيت كمان هيبقى مشروع هااااايل.

5. مشروع دروس خصوصية منزلية :

لو اي واحدة فينا معاها شهادة تؤهلها انها تدي دروس خصوصية تعلن عن نفسها انها في المكان الفلاني وتقدر تدي المادة الفلانية للسنوات الفلانية 
وبرده باسعار اقل من بره علشان الناس تجيلها وانشالله تبدأ بتلميذ واحد هو هيجيب زمايله لما يلاقيها احسن من اي حد بره وبرده هيبقى في بيتها 
ممنوع انك تروحي لاي حد بيته ( برده للامان ) .

6. مشروع عمل مشاريع التخرج :

وده اللي انا بفكر اعمله ان شاء الله بس هو محتاج حد تخصص حاسبات ومعلومات او يعرف برمجة كويس 
يعني بلاقي كتير اعلانات مطلوب مهندس كمبيوتر لعمل مشاريع التخرج وباسعار كويسة اوي فممكن لو واحدة متمكنة من الموضوع ده كويس 
تعمل مشاريع للبنات اللي بيبقوا محتاجين حد يساعدهم في مشاريع التخرج .

بس كده هي دي افكاري واللي تلاقي نفسها تقدر تنفذ اي حاجه فيها تتوكل على الله وتعملها واي سؤال لو اقدر اساعد هساعد على طول 
واي واحدة عندها اي فكرة ياريت تكتبها فوراااااااا.

وعايزه اقلكم طرق التسويق عن نفسك ومشروعك:

1.عن طريق المنتدى هنا طبعا 
2.عن طريق المنتديات اللي هي للسعوديات ( لو كنتي في السعودية )
3.عن طريق اعلان في الوسيلة او الوسيط ( برده لو كنتي في السعودية)

بس انا كده خلصت ومش طالبة منكم غير دعوة حلوة 
وربنا يوفق الجميع ............

0 التعليقات:

Twitter Delicious Facebook Digg Stumbleupon Favorites More